PajBèlAntre

KI  JOU  KA  JOU

NAN  PEYI  LOUGAWOU

Nan Miyami Veye Kiltirèl pou François Latour

Dimanch pase, Depi 5-è nan apremidi, Sant Kiltirèl Mapou te dekore  ak youn seri tablo  ki montre youn peyi wololoy ak youn bann zanfan dlo nan zye. Envite yo parèt younn-younn, grenn-grenn ;  men nan bouch. Nan sal-la youn bèl foto Franswa nan jenès li nan youn ankadreman dore kanpe drèt nan mitan youn tab ak balenn toulimen, youn vè dlo. Younn-younn ; grenn-grenn yo rantre. Yo chita. San pale. Men nan bouch. 5 :30è pa t’gen kote pou pike zepenng Toudenkou youn envite leve,  tèt bese,  li mache sou mwen epi li di : « zanmi ou kwè se vre ? Ou kwè vrèman vre Franswa Latou, Franswa Latou pa nou-an mouri ? asasinen ?… Ou kwè se vre zanmi ? »  Dlo t’ap swente  nan zye-l, pwal je-l muikmuik ; pwent nen-l tou wouj…Mwen pase men nan   kou-l, mwen mete-l chita…Mwen di Kouraj zanmi ! 

M’anonse pè Fritz Bazen ki mande  Bondye pou resevwa Franswa Latou nan woyòm selès-li. Epi se te Yolann Toma ak youn wosiyòl chante youn ave-maria ki fè tout mounn fremi.  Tèt bese, n’ap panse. Kilè mounn ap sispann mouri nan peyi-a ?. Kilè noumenm vivan pwoviswa ap sispann kriye?  Kilè n’ap chante ave maria pou lavi olye pou mounn k’ap mouri ?. Eske Bon Dye tande nou ?  Eske li soud. ?  Eske li lage nou tankou Boukmann te mande nan Bwa Kayiman.  Pouki youn men envizib pa bay ansasen sa-a youn palavire pou devye bal sa yo k’al ateri dirèk-dirèk nan vant  Francois Latour.

Annapre, Jan Mapou li deklarasyon Sosyete Koukouy  Miyami. Kouzen Degoutan  li deklarasyon Koukouy Kanada. Epi,  se te temwayaj sou vi defen-an, Adijangardy  pale. Li mete deyò youn bann ak youn pakèt koze nou potko konnen.. Li esplike kijan yo te kidnape Franswa, kijou, kilè ak kibò. Li fè nou konnen  konbyen lajan yo te mande $100,000.00 US ak telefòn viktim nan.  Adi di pou jan li pran bal-la se sèten Franswa te reziste paske kidnapè yo pa te kenbe mo yo. Jounalis-la di nou madanm Franswa Latou pase tout nuit-lan nan  kafeterya Dèlma-a ap tann patwouy ki te pou akonpaye-l al nan zòn  yo te detekte Franswa te ye-a.  Istoryen-an ajoute si lapolis te fè devwa-l ; petèt Franswa ta vivan jounen jodi-a. Inavy Joseph pran lapawòl, li di youn powèm ki montre nesesite pou nou viv kòm frè ak sè. Aktè,  ekriven-teyat Bob Lapierre (Dr. Pardo) eksprime endiyasyon-l, Dr. Bobo frape men sou tab-la nan youn powèn pimanzwezo ki menm lonje dwèt sou koupab yo,  epi younn dèyè lòt : Edeline Clermont, Yolande Thomas entèprete  powèm an franse ki te kout rèl  kolè  k’ap soti anndan kòf lestonmak  atis ak ekriven ayisyen-yo pou eksprime soufrans yo devan kadav Franswa Latou..  KiKi Wainwight anchene ak « rezistans » e « Fò n’lite ».Awi Fò n ‘lite mezanmi ; nou pa ka bay fòsdimal yo legen.  Yvette chante Ayiti yè ak Ayiti jodi-a. Youn paradi. Youn lanfè.  Eline Fleury youn jenn rènchantrèl ki sot Ayiti te mande lapèmisyon pou li entèprete «Pè letennèl» chante Emeline Michel ak akonpayman Didi Crèvecoeur sou gita. Kiki Wainwright sou tanbou.

Nan mitan tout bèl deklarasyon sa yo youn pèsonaj enpòtan nan peyi Dayiti rantre nan lakou-a. Li te gen 3 lòt  mounn ak li plis youn   teknisyen televizyon nasyonal. Se te Msye Gabriel Bien-Aimé, minis Edikasyon Nasyonal nan peyi d’Ayiti. Msye Bien-Aimé chita devan, ansilans, men nan bouch ak youn lapenn k’ap ravaje kè-l...

Anvan nou pase kòn nan bay Janklod ki te kavalye polka Franswa Latou,  bon zanmi-l depi lontan e ki te 2 pi gran aktè nan twoup Teyat Nasyonal-la, nou envite minis edikasyon nasyonal-la di de mo pou sikonstans-lan. Men sa li te di :

<<Franswa te gen abitid vin wè-m nan SenJera e nou te rann nou kont nou te gen plizyè bagay ankomen. Lè  m’aprann Franswa mouri mwen choke e mwen ka di nou : Mwen tris e mwen ankòlè ;

kouman youn sosyete ka rive kite youn krim konsa rive fèt ? Mwen tris e mwen ankòlè ; paske mwen deranje pou wè mwen oblije ap fè elòj Franswa pandan l’mouri. Mwen tris e mwen ankòlè François mérite mieux que ça…Mwen tris e mwen ankòlè…    paske se youn krim de trop. Youn sèl mounn ki mouri se youn crime de twop e Franswa se ankò youn crime de twop.  Konsa, m’ap mande tèt mwen,  peyi sa-a youn sèl bagay ki ka sove-l. Se pou nou tout aksepte pran detèminasyon pou non-vyolans. Pou nou tout andose edikasyon  pou kiltive lapè. Se zafè tout mounn.   Twòp famiy demisyone ; paske lavyolans  kòmanse depi nan fanmiy, ale lekòl, soti nan lari epi l’al anvayi tout sosyete-a. Il faut une campagne contre la violence. Fòk gen youn kanpayn kont lavyolans. Se pa youn kanpayn pou gouvennman-an fè osnon leta non... Se youn kanpayn pou tout mounn debyen enplike yo ladann.

Li pa nòmal pou youn mounn tankou Franswa mouri nan kondisyon manman vyolans sa-a. Youn nèg ki renmen peyi-a nan tout trip-li. M’gen temwayaj de sa m’pap rantre nan detay, men mwen gen temwayaj avèk ki fòs Franswa renmen peyi sa-a. Se pa pouryen li pran chans rete nan peyi-a malgre tout risk li konnen sa genyen ladan-l.

Li pa nòmal  anplen 21èm syèk gason ak fanm ap tonbe jan y’ap tonbe-a tankou bèt labatwa. Fòk krim sa-a revòlte konsyans chak mounn e fòk nou fè revòlt sa-a pase nan konsyans pitit nou ak pitit-pitit nou  pou yo grandi avèk youn konsyans klè sou enpòtans lavi lòt mounn…Pou yo devlope youn respè pou latolerans, respè pou fason panse lòt mounn. Li pa nòmal paske mwen pa gen menm lide avè-w m’oblije mouri pou sa !…Li pa nòmal paske mwen diferan de ou, pou gade-m depi nan tèt jouk nan pye pou sa…. Lim pa nòmal paske m’genyen youn meyè sitiyasyon pase-w, ou anvi sò-m… Ou wè youn sèl bagay ki pou rive-m eke m’pa dwe ekziste ankò. Se pa nomal ! peyi-a dwe reprann ni. La société doit se ressaisir… Si nous voulons donner une chance à  nos petits et à nos tout-petits ; la société doit se ressaisir. Moi comme Ministre de l’Education Nationale, je pense que l’éducation est la clé… l’éducation est la clé. Je ferai tout, pour qu’ on arrive à un nouvel homme  haitien, un Haitien qui pense autrement, un Haitien qui voit les autres autrement avec peut-être les yeux du cœur mais qui voit de façon profonde pour que ansanm nou rive fè chanjman ki nesesè pou peyi sa-a  parceque ce pays ne peut et ne doit pas mourir. Mèsi.(*)  

 

Kèk minit apre minis-lan deplase. Se byen dilere li pa t’rete tande temwayaj Jean-Claude Exulien-an.  Sa ta penmèt li mete youn ti degi sou konesans li de Franswa Latou ki youn  lejann, youn pilye, youn anbasadè, youn poto-mitan nan teyat ayisyen-an.

JC Exulien monte sou podyòm nan. Mèt la di ak youn ekspresyon tristès nan vwa-l, youn emosyon  ki fè dlo koule nan zye kèk mounn mwen renmen pale men aswè-a mwen santi mwen kontrarye mwen pa ka pale.   Li pote 11 afich, 11 pyès teyat li te gen chans jwe ak Franswa Latou. Li konnen Franswa depi 40 ane. Li fè 12-ane ap fè teyat ak li.  Pandan 40 ane ki sot pase la-a  Franswa se te pi gran komedyen ayisyen. Li bay kòm ekzanp  pyesteyat Caligoula. Nan youn konkou adramatik  Institut Franse te òganize ak 6 lòt group teyat, limenm Exulien, François , Denise Petrus, Adeline Perigord, Pierre  st sauveur. Ak tout lòt aktè yo, yo  te pote premye pri.  E pou Janklod, yo te blije kreye youn pri espesyal pou bèl diksyon. Jou sa-a, Franswa emèveye Emmanuel Robles ki te depasaj an Ayiti  apre li te fin asiste Caligula ak Franswa nan wòl Caligula. Youn nan  pyèsteyat Franswa jwe ak bèl siksè Exulien di : se Bouki nan Paradi (Frank Fouche). L’exception c’est la règle de Bertolt Brecht, Les Rosenberg ne doivent pas mourir…Gouverneurs de la rosée  (20  juillet 1967)… Franswa te jwe wòl Manuel ;  Janklod  nan wòl Bien-Aimé, papa Manuel. Pandan 4-è d’tan pa te gen youn bri touse nan sal-la Mèt-la di.

6 juillet 1978 se te premye prezantasyon Pèlen Tèt.         Malerezman Janklod te gentan pran ekzil e se nan youn lèt Franswa voye ba li, li aprann-l teyat sa-a se youn teyat vijilans.  Youn pyès solid ki  bay pouvwa politik epòk-la anpil soukous.

Msye sa yo nan Twoup Teyat Nasyonal-la te sèvi ak teyat pou te pote mesaj bay pèp-la.  Denonse mechanste  nan epòk-la.  Janklod   kòm bon istoryen kenbe dokiman  ak afich ak dat  tout gwo evennman teyatral sa-a te ekspoze yo epi bay piblik-la detay sou tout pyèsteyat Franswa Latou jwe.  Nou bat bravo pou Mèt-la. Li  se youn veritab antoloji vivan Youn bibliyotèk  nan domèn istwa ak literati natif-natal.

Sware-a fini ak youn ti gou anmè nan bouch nou ; youn eko rarabwa nan zorèy nou, youn kesyon san repons nan panse nou ki Kiyès ki asasinen  François  Latour ?  Epoukisa ?.

Nou remesye Mona Exulien ki te pote pate cho pou nou. Nou renmèsye Jeanette Grégoire ak Monique ki te fè youn bon ti te kannel ak La difference Restaurant ki te sèvi youn bon ti diri kole ak pwa souch awoze. Men anpil chay pa lou.                                                                                                                                                                                     

Jan Mapou

 

* Nan  pòsyon diskou Minis Edikasyon Nasyonal-la, nou fè kèk ti grate kèk fraz pou nou retire mo double yo. Nou tradui tou an kreyòl kèk pòsyon (pa tout) kote minis-lan te  awoze ak mo franse. Temwayaj-la disponib sou kasèt odyo.

 

=====================================================

 

NOU PA KA BLIYE  25 ME

Ak : Degoutan

 

2èm Pati

Apre demisyon Frank Sylvain, Etamajò-a eseye youn lòt fòmil: Kandida yo gen pou chwazi manm pou you konsèy gouvènman. Se konsa yo vin ak Conseil Executif de Gouvernement, pèp la te batise-l Kolejyal oubyen Kolèj. Premye me Kolèj resevwa anpil bravo devan Katedral, malgre kolonèl Cantave te rekòmande lekontrè. 18 me sa pa te fasil pou kolèj-la nan katedral-la. Eskonbrit pete, mounn mouri, mounn blese devan katedral. Mande Dye padon ,manm kolèj pa t’grafouyen. Menm semenm-nan, dezòd pete nan Sen Mak, Manm Kolèj la mande pou y’al wè sa k’pase. Nan Okazyon-an, Cantave refize kolabore ak manm kolèj yo, li te menm

ensilte yo. Kolèj-la vekse, li mete Cantave òlalwa. Cantave li menm revoke Konsèy-la.

 

Nan lespri Kolonèl Armand, Cantave pa t’ gendwa depoze Konsèy .Pou li, Cantave te anrebelyon.  Li mande pou y’ arete Cantave ki t’ale kantonnen nan Kazèn. Kolonèl Armand etabli kòmandman-l nan kan avyasyon. Lese-frape kòmanse nan mitan lame, plizyè jènn ofisye pèdi lavi yo. Antretan woulo konpresè ap plati tout mounn ki pa t ‘patizan Daniel Fignolé nan  Pòtoprens. Yo te demonte Radyo Pòtoprens ki te anba Estad Sylvio Cator, pakanpak. Rive nan

apremidi, monseyè Poirier ak Monseyè Augustin negosye avèk Fignole aksepte vin prezidan d’Ayiti annatandan eleksyon. Antonio Kébreau vin chèfdetamajò.

 

           25 me youn jounen ki te cho ki refwadi byen vit. Evénman  gwosi jistan yo eklate. Aktè ki te sou sèn yo te malen men tou yo te konn limit. Kandida yo nan youn deklarasyon tètansanm eksplike dezisyon yo. Chèf militè yo seselfe. Tout mounn konprann youn sèl bagay. Te gen youn malè pandye sou tèt peyi d’Ayiti. Youn refleksyon k ‘te fè yo flechi pou youn moman avèk lide ki move kou  k’ap vin pita. 

 

 

 

 

 

NAN MIAMI PRIMEVÈRE AP PRAN FÒS.

 

Òganizasyon PRIMEVERE  De Floride ap pran jarèt. Oganizasyon Primevère derape nan Nouyòk gen 30 ane. Branch Miyami-an koumanse  pouse bonjan rasin. Ane sa-a fè yo 5-èm ane depi branch Miyami-an fonde. Margerite Manigat Paultre  envite manm Miyami yo ak kèk zanmi nan youn resepsyon ki te fèt nan otèl Hilton  dimanch 10 jen ki sot pase la-a. Primevère de Floride s’oun klib ayisyen ki pa nan kozman politik men ki plis kiltirèl, atistik e sosyal.  S’oun òganizasyon benevòl ki pa la ni pou fè komès ni pou ranmase lajan nan bi pou fè biznis. Klib la enkòpore nan eta Florid la. Li gen 9 manm nan komite direksyon-an.

Kidonk, dimanch pase 100 zanmi ak manm Primevere yo te reyini nan youn sal nan otèl la.. Youn bèl apre-midi detant, bèl anbyans, bèl mounn  e se te youn bèl okazyon pou nou te rankontre youn grap mounn nou pa te wè depi lontan.  A 2 :30pm dine sèvi.  An disiplin tab apre tab envite yo te leve al sèvi tèt yo. Kidonk tout mounn manje vant deboutonnen, anyen pa  gaspiye.

Apre lamanjay, lenguis, pwofesè,  ekriven Gérard Ferrère prezante lami Max Manigat ki fenk  defounen  Mots Créole du Nord D’Haiti  origines- histoire- souvenirs Youn prezantasyon wololoy ki te plis youn ti mini entwodiksyon sou liv-la plis pase youn etid byografik  sou Max Jera rekòmande piblik –la  li nan do-po liv –la.

Max pran kòn nan.  Bèt tonbe. An Franse.  Apre  1-èd’tan ap  teke grenn mo ; li di piblik la kote yo soti e ki sa yo vle di nan  kreyòl mounn nan nò yo,  epi li travèse sou lakilti.  Li pale nou sou enpòtans lanng Ayisyen-an, ki kote li soti, dinamik lanng nan estrikti lanng afriken yo. Li konekte nou ak tout lòt lanng afriken yo. . Max pale de mizik, dans,  enstriman mizik, rit dans yo  , penti  jwèt, maji nwa, maji blanch, matènite, pwovèb,  lakou, penti, Anfen Max travèse  youn manman distans  depi Ayiti rive an Afrik, depi Lafrik rive Miyami pou li te ofri nou youn bòl mo byen prepare, byen sèvi,  asezone ak  kèk twouvay Jaquelin  Garçon yo. Youn apre midi ak Primevère ki mande akontinye. Nou bat bravo pou mesye-dam yo…Konpliman Max !  (JM)