Kaptenn Koukourouj ap gade Kaptenn Koukourouj nan glas

Ak Lionel Hogu

Se payèt zetwal san limit

Alo Soul,

Jodi a pandan mwen chita nan boukan pen kotidyen mwen, anndan «UPS,» kote mwen ap travay , mwen pran youn tan tou kout pou mwen dedouble lespri-m anndan youn farinay sonje. Mwen repase nan tout espas inoubliyab nou yo , kote plizyè milye papiyon lanmou te poze sou tout bòday flè pou yo eklate payèt solèy dimaten ki te limen dekou karès nou.

Nou fè anpil wout, nou jofre anpil kalfou, nou ta menm dwe fè pi plis toujou. Pami etensèl souvnans ki rive jwenn mwen aswè a se Tajmahall, Lexington, Seascaucus,Dorchester, Hayott, Randolph ak Blue Hill ki viwonnen-m epi vin pale ak mwen sou chètout prezans ou. Chak rejyon sa yo mache ak vibrasyon pa yo. Poutan, mwen pa kab nonmen non Lexington san mwen pa kite Hamilton detounen-m nan siyay li epi fè mwen santi youn malèz anbachal ki toujou brime apeti ou. Poudayè, se fòt ou. Akoz imajinasyon ou ki mete ou nan kè sote, ou kontinye asosye rivyè sa a ak youn reyalite depaman. Epitou, pou jan ou maton sou vijilans ou , mwen ap mande tèt mwen, kouman ou ta vle mwen ta jwenn tan pou m’al bouloze nan lòt patiray san ou pa ta gen tan rale-m nan lonngvi ou !

Antouka! Ann pedale tounen. Mwen sèten dwe gen youn Hamilton anndan Lexington. Kit se youn rivyè, vil, riyèl, kenpòt. Annatandan, ou dwe toujou sonje sa: pa fouti gen plezi si ou pa mete-m sou zèl ou osnon san mwen pa mete ou sou zèl mwen. Se tankou pwovèb zanmi mwen an te di-m lan : «Lorsqu’on a goûté à l’eau du Nil, on ne peut plus étancher sa soif ailleurs .»(1) Wi!! Mwen manke bliye koze-m.

Tajmahall, Seacaucus,
Dorchester, Hayott,
Randolph, Blue Hill,
Yo tout
Se payèt zetwal san limit
Pami divès boukèt
Nan lavi lanmou nou.

Nanpwen yo younn ki klere ak menm fòs, men se yo tout ansanm ki kontinye ap gide-n sou chemen lanmou san lizyè ki makònen nou depi sou ban lekòl segondè. Chak grenn flè sa yo se youn sezon prentan nan lavi lanmou-n. Yo chak louvri je nou , nan fason pa yo, sou pwòp tèt nou ak sou presyon reyalite sosyal ki kòmande konpòtman nou.

Pou di Tajmahall pa ta vrèman vre premye flè nan jaden pasyon nou! Pou di se pa premye fwa tou nan lavi nou! Nou te rive dòmi kò pèdi , kè pòpòz tankou youn pòte marasa! Lexington te kreye Soul nan mitan Lasous, non mistik ki monte apik ak branch limyè tout koulè nan kòwakò dyougans lanmou nou pandan pawòl nou te pran bobinen. Poutan, se nan Seacaucus ak Dorchester sans chanèl ou te pran lyann kowosòl. Kò ou te delala nan endiferans, kwake Hudson River ta pe bay bouya yo tout kalite kristè nan mouvman chalerin yo pou yo te bwode somèy nou.

Rive nan Hayott tankou lamayòt nou pèdi lapawòl, sepandan nou te pran woulib kawousèl sou pik Makaya pa twò lwen Vye waf la. Konsa, retisans te tounen jwisans. Womans nou deplòtonnen ak fil nèf lapasyon; nou rebise lanmou jouk nou teri Randolph Avni avèk tout chalè nou ki tounen sajès tou pre Blue Hill.

Premye kadè nou nan Randolph Avni, se te eskonbrit souf nou dekoupe ak sakad ritme kò nou nan melodi frison vwa ou ki te vle vare sou somèy Inosans. Apre bout tan maraton sa a , vanyans mwen te kilbite nan mitan gagè nou ak youn espant ki ta kab kite tras li nan lespri-m. Youn lòt bò , mwen pa dwe plenyen , paske bon kòk se nan gagè sa mouri. Kanta pou Blue Hill, li kanpe nan enpas youn rèv, swa pou nou reyalize, swa pou nou kachte nan kòfrefò kristal li. Antouka, kelkeswa fason nou abòde li a , Blue Hill ap toujou rete youn mistè pou nou dekouvri nan Lavilokan kote chandèl pawòl nou se youn fòs prezan-absan ki ap veye sou lanmou nou.

Ife pou Soul
Fanm Solèy
ki ap fleri nan jaden lavi li.

(1) Lè youn mounn fin goute dlo larivyè Nil, li pa fouti al pase swaf li nan youn lòt rivyè.

Fanm

Fanm pote lavi
Pi wo pase fetay solèy
Nan voye wòch monte
Bwote dlo desann
Nan lakou plètil
fanm leve nechèl wotè van
K'ap bale wouze

Nan peyi malfini
Fanm charye douvan jou-l
Sou tèt kamyon bwat
Madan sara fè ovètay
Pou po pistach

Lè fanm ap goumen
Kòtakòt ak gason
Bab pou bab ak ranyon dife
Lè fanm pran sèt so
Anvan li di l'di alatraka

Fò ou konnen konbyen kalfou
Jipon-l janbe
Konbyen flanm li travèse
Anvan bonèt li chavire

Fanm mennen lavi
Nan sous dodomeya
Kwape lamizè
Twaze dyòl maldyòk
Dwèt madichon fanm
Pa respekte pè pap
Lè fanm vanyan ap mache
Li sanble tèt koupe ak manzè lavi

Lesiv defigire men-l
Kout batwèl
Ant salyè e valyè
Trese riban
Nan boukan pen kotidyen-l
Semèl jounen-l
Manje pousyè
Vale kalfou
Twoke twòkèt pou chay
Fanm O!
Pa gen baryè
Pou mezire kouray-ou

Michel-Ange Hyppolite ( Kaptenn Koukourouj)

Youn lèz nan Zile Nou, p. 48 - 49, 1996

--------------------

Bòn Fèt Papa

Pou papa-m

«Tout papa se papa »

Ou kanpe lespri-n
Zetwal sèt branch ou
Paweze limyè
Nan lavi nou

 

Ou monte lesprin-n
Pawòl vanyan ou fè nich
Dedwane etensèl
Sou rekòt nou

 

Ou nouri lespri-n
Kouray ou
Simaye plan solèy
San rete
Nan jaden konesans nou

 

Zile Nou ( 1995) p. 33

--------------------

« Twa fèy twa rasin o ! Jete bliye, ranmase sonje.»

 

Chak chelèn je nou
Youn chandèl pasyon
K’appran swenyay lanmou
Anba pye lalin mwadme

 

Chak lanm rèv
Nou plante
Grandi
Yo grandi bèl
Balejoudlan trese lespwa
Nan zòrèy zetwal andòmi

Chak jou nou leve
Foto ou pran woulib
Sou glas fele  larivyè jele
Poutan
Latibonit degoute tak
Lagrandans akoukouman
Nan kalbas

Chak fwa senmafò fè nou siyon
Lesrpi-m vwayaje
Mònlopital
Senjera
Lasoustijo
Toupatou
Kote lavi ak lanmò
Ap twoke kòn

Zile Nou ( 1995) p.39