Pitit
mwen chèche.
Chache konnen
Konnen kilès ou ye
Kilès ou ye nan mitan pèp Bondye a
Pèp Bondye a genyen tout ras
Tout ras pa gen menm listwa
Menm listwa si w soti nan menm nasyon
Nan menm nasyon ak zansèt ou yo
Zansèt ou yo se tout fanm ak gason
Tout fanm ak gason ki te anba chenn lesklavaj
Anba chenn esklavaj kolon
Esklavaj kolon k ap kontinye jouk jounen jodi a
Jouk jounen jodi a nou nan mawon
Nou nan mawon devan tèt nou
Devan tèt nou genyen reskonsablite nou
Reskonsablite pou nou ranmase dinyite nou
Dinyite nou kòm moun lib
Moun lib ki pa zonbi
Ki pa zonbi sou bitasyon grandon
Sou bitasyon grandon nasyonal, entènasyonal
Grandon nasyonal entènasyonal tou patou sou latè
Tou patou sou latè y ap kontinye maspinay
Maspinay pitit pitit zansèt nou yo
Zansèt nou yo se te gwo lidè
Gwo lidè tankou Kristòf ak Desalin
Desalin papa nou tout
Papa nou tout pitit libète
Pitit libète pa ka rete nan tete
Nan tete lang ak zangi
Zangi anba wòch
Wòch fo zanmi
Zanmi rat mode soufle
Mode soufle maleng ou ban m
Maleng ou ban m nan tèt mwen
Nan tèt mwen pou m pa wè
Pou m pa wè si w ap toufe m
Si w ap toufe m ou pa vle m respire
Ou pa vle m respire pou mwen pa viv
Viv lavi
Lavi m kòm nèg
Nèg pitit ginen
Pitit ginen ki kwè
Ki kwè nan tèt li
Nan tèt li genyen sajès ak lakonesans
Lakonesans sou kijan moun viv
Moun viv nan konbit
Nan konbit pou nou gounen
Pou nou goumen ak tout zam ki nesesè
Tout zam ki nesesè pou n elimine
Pou n elimine inyorans, lamizè, laperèz
Laperèz devan lòt ras
Lòt ras ki vle nou pran yo pou siperyè
Siperyè nan pawòl, nan panse, nan aksyon menm nan lespri
Menm nan lespri pou n pran yo pou Bondye
Pran yo pou Bondye jamè
Jamè sa a ekri an wouj
Wouj koulè san
San grangran manman n ak grangran papa n ki batay
Ki batay pou mwen nèg
Mwen nèg, nou nèg viv tèt leve
Tèt leve je n nan je yo
Je n nan je yo pou n di yo nou pa kapab bliye
Nou pa kapab bliye rasin nou
Rasin nou plante fon
Plante fon nan nanm chak nèg
jude jean-francois