Osijè Selebrasyon Mwa Kreyol 2002 nan Montreal, Kanada. |
Jafrikayiti |
| Noumenm, responsab REKA, nou wete chapo nou pou nou salye kokenn chenn travay KIPKAA fè ane 2002 sa a pou li te reyalize premye Selebrasyon Mwa Kreyòl la nan lavil Montreal, Kanada. Tout bon vre se te yon bèl koudjay tèt ansanm kote anpil save ak zanmoure lang Kreyòl la te kase randevou youn ak lòt epi ak gran piblik la pou yo chita tande, boukante lide, chante, danse, nan yon anbyans kote lang Kreyòl la t ap resevwa ochan ak sewòm li merite de dwa nan men tout fanatik li yo. Kit se te bèl ekspoze lengwis Albert Valdman nan premye jounen an, kit se te tout lòt aktivite ki vin mennen nou nan kalfou bèl randevou 26 Oktòb la ak patisipasyon Franketyèn, Lilianne Pierre-Paul, Adeline Chancy epi Gérard D. Montès, nou kapab di chak aktivite yo te pote yon varyete engredyan fòtifyan ki vin kore manbràn lang natif natal ki simante tout Ayisyen ansanm nan. Nou pa gen mwayen fè yon rale total kapital sou tout aktivite ki te reyalize nan kad selebrasyon wodpòte sa a. Mèzalò, nou envite ou al fè yon koudèy sou paj entènèt KIPKAA a, kote ou va jwenn plizyè dokiman ki rapòte kouman aktivite mwa Kreyòl la te dewoule nan Montreal. http://hometown.aol.com/mit2kreyol/Index5-kr.html Yon lòt fwa ankò nou di KIPKAA ak tout asosye li yo kenbe fèm pa moli ! Nòt: Nou vin aprann byen ta ke, ane sa a ankò, chirepit anndan kominote kreyolis Montreal la te lakòz ke gran piblik la te sètoblije chwazi ant 2 bèl koferenans ki te òganize menm jou, menm lè. Asavwa, konferans Franketyèn t ap bay nan kad jounen 26 òktòb la sou labanyè KIPKAA, epi konferans Koralen (Jean-Claude Martineau) t ap bay sou labanyè Sant N a Rive. Yon lòt fwa ankò nou sipliye kanmarad k ap feraye pou byennèt lang Kreyòl la nan lavil Montreal, pou yo eseye fè kowòdinasyon an pi byen demannyè pou fèt la ka kontinye bèl chak ane epi pou zanmoure lang Kreyòl yo kapab benefisye bouyon fòtifyan an san mankman. Ak anpil respè, nou di bilolo pou nou tout kanmarad ! Jafrikayiti Prezidan REKA |